政情：有相為證：賀懲教署長退休 掛橫額變擦錯鞋
懲教署署長邱子昭將喺下個月退休，臨別秋波，近月頻頻到各懲教院所巡視，位於赤柱嘅懲教署職員訓練院大門，日前就掛上印有邱Sir圖像嘅大型橫額，上面更寫上以邱Sir中文名字創作嘅對聯「君子博物、功昭日月」，就引起職員關注，有職員認為係有人想擦鞋；不過，好可惜擦錯鞋，一來邱Sir事前全不知情，二來都唔鼓勵同事咁做，絕無搞個人崇拜，而據知呢張橫額最後消失咗。
懲教署發言人回應，話署長須按法例定期巡視同視察所有懲教設施，傳統上，署長會喺退休前巡視，仲同啲職員合照留念，現任署長亦都按照呢個傳統，以不影響運作為大前提，由今年六月初至今，廿九個設施中巡視咗其中十一個。
發言人仲話今次署長到職員訓練院巡視，之後仲主持知識管理系統啟動禮，期間亦有同事出席；又話知識管理系統有助提升個人學習，之後署長亦有同職員喺草地上大合照，但當時就無任何背景設置，合照嘅人就包括職員、正在受訓學員、教官同退休人員。