政情：黃錦星惜食 全靠媽媽教導有方
本身好注重環保同惜食嘅環境局局長黃錦星（星星），尋日出席一個活動時以「修身、治港、齊家」寄語中學生支持環保節能生活。佢話自己出生基層家庭，「難得少年窮好有道理，阿媽話唔好浪費食物，如果唔係就娶豆皮婆，所以唔會嘥食物。」
與女兒約法三章慳電
佢又重提自己成家立室後，收到電費單就電郵傳畀家人，嚴謹地監察每月嘅電費同用電量，又同女兒約法三章，每晚氣溫如高達攝氏廿八度，先考慮開冷氣，而喺過去五年亦做咗好多協助「治港」嘅環保工作，當中包括增加郊野公園面積近四十公頃，未來亦會增加近五百公頃喎。
其實星星出席活動係傑出青年協會舉行學生活動，以《超越自我 擁抱未來》為主題，探索「未來生活」同「平衡生態」，有女學生即場表演，佢哋翻開紙製道具魚嘅肚子，顯示海洋生物食咗唔少由人類棄掉嘅膠樽，鼓勵在場人士棄用膠樽，自攜水樽。