政情：CY落台 謝偉俊即上位
前特首梁振英（CY）上任後風波不斷，立法會議員謝偉俊（Paul）過去多次批評CY，唔單止曾喺特首答問大會上直斥CY剛愎自用、失信於民，阿Paul話過去五年CY在任以來，冇擔任任何公職。但喺新政府上場，佢終於有「零的突破」，被現屆政府邀請加入研究本港酷刑聲請問題嘅委員會。
獲邀加入酷刑聲請委員會
CY涉嫌收受澳洲UGL公司五千萬元，以及被指涉干預廉政公署人事任命安排等，阿Paul更擔任立法會調查梁振英UGL事件專責委員會主席。佢喺過去五年並冇獲邀出任任何政府成立嘅委員會，唔知係咪同佢「口多多」有關？
但喺新政府上場，唔知係咪「新人事新作風」，阿Paul透露，佢終於有「零的突破」，被現屆政府邀請加入委員會。佢話政府有意成立一個研究本港酷刑聲請問題嘅委員會，將由退休法官出任委員會主席，可能由於佢有法律知識，所以獲邀。唔知阿Paul將來會唔會獲邀加入更多委員會發揮所長呢？