政情：立會咪霸放肆蔣麗芸嗌限時
立法會議員同政府官員不時都要就社會事務回應傳媒提問，有見及此，立法會綜合大樓安排俗稱「咪兜」嘅採訪位置，等佢哋可以盡快回應。但久而久之，有部分議員變咗「咪霸」，時不時喺咪兜前面長篇大論，更有啲議員講足半個鐘都唔肯走，搞到輪候使用咪兜嘅議員或官員都等到唔耐煩。議員蔣麗芸（阿Ann）亦睇唔過眼，促請行政管理委員會要嚴厲打擊立法會咪霸，限制每個議員最多只可以用十分鐘咪兜！
梁美芬爭咪兜 搶贏葉建源
事緣尋日喺特首答問大會結束之後，本來有唔少傳媒都爭相就新政府嘅教育撥款問題追問教育界議員葉建源，但就喺呢個時候，另一位議員梁美芬搶先行到咪兜前，準備發表對一地兩檢嘅意見。可能係做吓樣都要讓吓女士，梁美芬就講咗差唔多十分鐘，但全程冇乜傳媒向佢提問。葉建源亦緊接其後，去咪兜表達對教育撥款嘅意見，但因為有唔少傳媒追問，最終都霸咗個咪兜成十五分鐘先完成訪問。
當時排喺葉建源後面嘅仲有阿Ann等五個民建聯（民記）成員，阿Ann就似乎等得唔耐煩，即場提出建議，話叫行管會限制議員用咪兜「不得超過十分鐘」，就算係未講完都要重新排隊「最多之後返嚟講過！」
點名批「一舊雲」講嘢長氣
阿Ann仲點名話民主黨（白鴿黨）嘅黃碧雲（一舊雲）平日都「鍾意講好長」，仲好體貼咁話好多傳媒都要聽唔同政黨嘅回應，如果咪兜不設時限嘅話，咁人人都可以講足半小時，咁就好可能影響傳媒嘅採訪工作。
點計先？一個議員十分鐘，正如民記其後一拖四出咪兜見記者，咁計法，係咪要畀民記講足五十分鐘先？到時其他政黨怕蝕底，必定有樣學樣，霸咪兜時間肯定仲長，咁咪捉蟲。仲有邊個負責計時先？睇怕立法會秘書長陳維安都好頭痕。
照計最好嘅方法就係搵啲語文專家嚟教議員講嘢要講重點，否則擺十個咪兜喺度都唔夠用呀！