中環出更：遼寧號一票難求 議員齊撲飛
中國首艘航空母艦「遼寧號」及三艘屬艦將於明日（7日）至下周二（11日）停靠香港，解放軍駐港部隊早前公開派發嘅二千張個人券，於短時間內火速一掃而空。大批建制派立法會議員都周圍撲飛希望有份參觀遼寧號，但都大呻一票難求，好似同樣對參觀遼寧號有濃厚興趣嘅立法會議員梁志祥及工業界議員吳永嘉，至今未收到有關嘅邀請。
吳永嘉話，今次係遼寧號首次公開予各方參觀，相信唔止香港人想參觀，又透露自己對於艦載戰機及直升機最有興趣。佢認為，有關方面邀請全體立法會議員前往難度不大，因為唔會全體議員都有興趣喎。
馬逢國黃國健獲邀登艦
不過，據聞有小部分建制派議員如願以償有票在手，之不過就以議員以外嘅身份獲邀參觀遼寧號，包括工聯會黃國健、體文界議員馬逢國等人。
新任行政、立法「雙料議員」嘅黃國健透露，尋日下午獲得參觀遼寧號嘅門券，佢興奮之情溢於言表，形容「點可以唔去」，笑言自己係「大鄉里出城」，對遼寧號上所有事物均有興趣，加上過去曾經行船，因此對此特別期待。
身兼港區全國人大代表、自認係軍事迷嘅馬逢國，雖然暫時未收到參觀遼寧號嘅門票，但已確認在獲邀參觀之列，換言之將有份近距離一睹遼寧艦呢艘航空母艦。
卓妮