中環出更：同享煙花樂趣 盛品儒倡設燃放區
早幾日卓妮見到菁英會理事盛品儒同太太蔡一鳳拍拖睇煙花，盛品儒話佢細個都有玩煙花，但就唔係特別鍾意睇，而蔡一鳳就去過唔同地方睇煙花，好似澳洲咁，但佢印象最深刻嘅都係澳門煙花，因為每年澳門都會有國際煙花比賽匯演，喺九月至十月期間每個禮拜都有唔同隊伍參加，話明係比賽就梗係每一隊都出盡法寶，而佢喺澳門住嘅地方又啱啱望到，所以就特別有感覺喇！
講起香港不時有市民偷放煙花，佢哋就話澳門有一啲地方係合法煙花燃放區，覺得香港都可以參考，喺海旁或者空曠地方設立類似區域，等香港嘅年輕人都可以喺符合安全考慮嘅情況之下玩下啲好小型嘅煙花， 感受吓呢一種樂趣。
柯仔細個玩煙花「辣」親手
轉頭見到立法會議員柯創盛（柯仔）同太太嚟， 柯仔仲諗起細個嘅時候都曾經喺內地玩過細細支嘅煙花，好懷念當時一班小朋友每人拎住支煙花鬥拎得耐，睇吓邊個可以拎到最後先掉低。
柯仔話以前仲係細路仔嘅時候「唔知痛」，同啲朋友仔鬥玩煙花揸到最後嗰個就係贏，但要贏梗係有代價o架，佢就試過「辣」親隻手，不過當時痛唔痛已經完全唔記得咗嘞，笑言嗰一刻淨係覺得好開心同埋「好威」囉！佢仲話後生嗰陣，睇煙花都係好多情侶嘅拍拖活動之一，佢亦曾約過太太出去食飯兼睇煙花，不過佢同太太都唔係特別鍾意睇，再加上好怕人多，所以之後都係睇電視算喇！
當晚現身煙花匯演晚宴嘅仲有「街市大王」之稱嘅香港廣西社團總會永遠會長鄧清河，佢話自己係新界圍村人，好細個嗰陣都曾經接觸過煙花，不過印象唔係好深刻，但就大讚呢日煙花好靚咁話。
卓妮