病人鄧桂思因醫療失誤而要換肝嘅事件，醫管局尋日公布檢討報告，透露診症記錄已寫明病人係乙肝帶菌者，就係因為兩個主事醫生警覺性不足開漏藥，最後搞到病人要先後兩次換肝，依家仍然危殆。但係成份報告都冇提過懲處問題，醫管局主席梁智仁只係話代表大會多謝檢討小組，而食物及衞生局局長陳肇始就話若果報告證實要處分，醫管局會跟進，又將個波拋番畀梁智仁。咁講法，即係大家鬥卸膊啫！
