政情：八網難逃：參觀酒廠 黃傑龍變一舊飯
香港餐飲聯業協會會董黃傑龍（Simon）早前帶咗佢旗下食肆嘅同事去日本，話要體驗專業嘅和牛知識，兼且增進同事之間嘅友誼。佢尋日就專程去參觀當地一間酒廠，聽吓酒廠嘅傳人介紹清酒嘅製造過程，Simon仲盛讚酒廠有誠意，專登用冰造嘅杯仔畀客人試酒。佢又趁機行入酒廠用嚟煮米嘅大飯煲裏面，當堂變咗做一舊飯！
清酒係一種釀造米酒，以米、米麴同水發酵之後，形成濁酒，再經過濾後，就成為清酒。Simon尋日一見到酒廠嘅大飯煲就覺得好得意，一般都好少有機會見到用嚟為清酒煮飯嘅大飯煲，咁啱呢間酒廠可以畀客人行入飯煲裏面體驗，Simon都把握機會入去感受一下。事後佢話自己都係第一次行入飯煲裏面，仲話感覺好有趣，自己變咗一舊飯喎。
