政情：張德熙讚弟弟「天生係演員」
金銀業貿易場理事長張德熙嘅弟弟係已故著名演員傅聲，張德熙話一直都覺得弟弟拍戲好辛苦，但就從來冇勸過弟弟唔好做演員，認為弟弟有一種「天生就係演員」嘅特質，令人覺得非常吸引，以前仲有好多女同事問佢攞弟弟嘅簽名添！
常有女同事拎傅聲簽名
張德熙話自己以前經常去邵氏片場探弟弟班，覺得做演員真係好辛苦，例如黐頭套都要成個鐘，加上又要化妝，而黐住頭套咁熱，往往仲要拍武打戲，又打又跳，有次弟弟吊威吔跌落嚟，仲整親條頸添，自己當時都即刻去睇弟弟嘅傷勢。不過，雖然拍戲咁辛苦，但係弟弟天生就係演員，自己從來唔敢勸佢唔好做。
咁自己有冇心郁郁想拍戲呢？佢話從未獲邀做演員，因為適合上鏡嘅人，左右兩邊面都要好完整，自己就唔係嘞，而演活一個角色都唔容易，加上自己又唔能夠「由朝捱到晚」咁拍幾組戲，笑指自己都係適合社交圈多啲。