政情：不甘寂寞 民主阿婆黐埋西瓜琦 赴英唱衰香港
被謔稱「西瓜琦」嘅本土民主前線發言人梁天琦近月又再「蒲頭」，繼早前去英國倫敦同加拿大等地出席研討會之後，又夥拍有「民主阿婆」之稱嘅前政務司司長陳方安生赴英，再次「唱衰」香港。一個係政治光環殆盡嘅舊電池，另一個係畀市民摒棄嘅港獨分子，佢哋根本已經冇人理會，今次走埋一齊，無他，咪又係不甘寂寞囉！
喺舊年立法會選舉被褫奪參選資格之後，梁天琦一直「潛水」，直至青年新政游蕙禎同以佢「Plan B」身份成功當選嘅梁頌恆被取消立法會議員資格之後先蒲頭，因而被謔稱西瓜琦，之後多次接受傳媒訪問，話怕還押失去自由，又自嘲好廢，但隔咗一段時間又活躍起嚟。
料再邀外國介入港事務
繼上月開始一連幾次喺英國嘅大學演講後，佢喺英國時間七月三日，就同民主阿婆應邀出席兩場活動，其中喺英國智庫Henry Jackson Society（亨利杰克遜會）舉行嘅閉門研討會，西瓜琦演講「香港本土主義運動的未來」，預計都係離唔開借機宣揚其「港獨」主張，又叫外國介入香港事務，蠱惑人心。
隨即佢哋就出席英國國會關於香港回歸二十周年嘅聽證會，西瓜琦會演講「香港的民主逆差」，同場仲有英國保守黨前外相聶偉敬（Malcolm Rifkind）同University of Surrey（薩里大學）政治系助理教授馬寶康（Malte Philipp Kaeding）。
兩人冇晒人氣遲早玩完
民主阿婆過去一直夥拍有「李漢奸」之稱嘅民主黨創黨主席李柱銘等人唱衰香港，而李漢奸之前亦曾夥拍自決派嘅香港眾志秘書長黃之鋒外訪。依家民主阿婆黐住西瓜琦，估計都係外國對民主阿婆呢啲「舊電池」已不感興趣，叫座力愈嚟愈細，想搵西瓜琦嚟救吓自己嘅人氣。
之不過，民主阿婆諗錯晒嘞，事關港獨冇出路，西瓜琦已經冇人理，亦冇晒人氣，近期頻頻蒲頭都只係好似民主阿婆咁不甘寂寞，所以去外國唱衰香港，佢哋走埋一齊都係遲早完。