中環出更：郭基煇爆爸爸炳江再讀碩士
新地前聯席主席郭炳江早前上訴失敗重返獄中服刑，其子、新地執行董事郭基煇（Adam）尋日出席活動時透露，曾往探望父親一次，同爸爸一直有書信來往，佢話爸爸返回監獄服刑首星期有掙扎，未能適應，並且掛念屋企同過去一年嘅時間，但一星期過去，爸爸已明白到要忘記過去，向前看，心情有所調整，佢同以往一樣，有勇氣、信仰同感到平靜。佢又透露，爸爸正在攻讀另一個新課程，係神學碩士課程。
尋日喺挪亞學堂暑假體驗營暨「玩轉機械智激FUN」啟動禮，為逾萬名兒童同青少年舉辦一系列暑期活動揭開序幕，活動內容包含教育界近年所標榜嘅STEAM學習，即係科學、科技、工程、藝術同數學嘅課程。Adam話以前中小學讀書只係要求死記知識，認為呢種學習方式太死板，但佢去咗外國留學後先發現返學都可以咁好玩，所以都樂見近年嘅香港開始注重課外活動同STEAM學習喇！
阮曾媛琪曾入寨城做義工
香港理工大學副校長阮曾媛琪就透露，唔少理大學生利用暑假進行服務學習，除咗到內地做義工外，連東南亞同非洲較為偏遠地區都覆蓋埋，好似有學生到訪盧旺達為當地窮困家庭設計太陽能收集板，亦有學生到訪內地，為處於東北嘅少數民族鄂倫春族作口述歷史。
阮太更透露，年輕時都有利用暑假去做義工，仲係深入有「三不管」之稱嘅九龍寨城添！佢話能夠放心入去，係因為跟隨住學校老師，而且寨城嘅人好有義氣，知道你係好人就唔會對你不利咁話。
同場嘅家長會創辦人黃施少雯就認為小朋友可以喺玩樂中學習，好似訓練大小肌肉、社交能力等，而父母亦應該從玩樂同學業作出平衡，唔可以過分保護子女喎。
卓妮