政情:馮煒光卸任 即赴北韓旅行

新政府前日上場,多名上屆政府嘅問責官員亦隨之卸任。政府前新聞統籌專員馮煒光隨即出發遊山玩水,但目的地唔係港人嘅旅遊熱點日本、歐洲,而係需要跟隨旅行團先可以去嘅北韓。

馮煒光尋日喺Facebook上分享自己嘅北韓旅遊證件、來往內地城市丹東同北韓首都平壤嘅火車等相片,更喺鴨綠江上「簽到」,留言打卡透露自己剛過境。佢又話自己未來四日唔能夠上網,能夠「耳根清靜一下」。

網友提醒「唔好搣傳單」

唔少網友都紛紛留言,提醒佢要注意安全同埋「唔好搣傳單」。而馮煒光嘅前黨友、民主黨南區區議員柴文瀚亦有留言,建議佢抵達當地要飲「大同江」啤酒而唔係青島,否則當地人會「唔當你自己友」。

馮煒光喺二○一三年曾自比為「白宮發言人」,朝鮮半島嘅局勢亦持續緊張,睇嚟佢都要多加小心嘞!

第一手消息請下載on.cc東網iPhone/iPad/Android/Windows Phone Apps