善有善報，惡有惡報；若然未報，時辰未到；時辰一到，一切都報。漢奸黎向旗下員工開刀，大搞「假自僱，真裁員」，畀伙記媽到反艇，工會決定發起工業行動，肥佬平時搞得人多，家陣後欄着火，都可算現眼報囉！
爛果報平時最興煽動人遊行示威，唯恐天下不亂，啱啱過咗嘅七一，佢哋雞乸咁大隻標題「上街創造命運」，家陣工會響應號召，起而抗爭，希望保住飯碗，「創造命運」，亦都好合理。不過既然搞得抗爭，唔該去得盡啲，淨係着黑衫喺門口默站同網上聯署，不痛不癢，你老闆睬你都有味。不妨以其人之道還治其人之身，長期佔領淫媒大樓，甚至整番個「私家皇座」；再唔係可以學黃之鋒佢哋嘅「行為藝術」，用黑布覆蓋大樓外爛蘋果標誌，最好整埋個靈堂，咁搞法壓力就大得多嘞。
講番漢奸黎「假自僱」呢招，除咗慳番遣散費、長期服務金等一大筆，將來員工要各組公司接生意，難免「打崩頭、爭飯碗」，呢啲分化離間之計，用心不可謂不歹毒。有人就講得啱嘞，未被解僱嘅員工一定要槍口一致，咬實漢奸黎唔放，否則盞畀人逐個擊破嘅咋！
正所謂有咁耐風流有咁耐折墮，員工籠裏雞作反，只係報應嘅開始。大家有眼見，壹淫媒喺港台嘅業務全線潰敗，其中香港業務由一一年至今嘅七個財政年度累積虧蝕近十五億元，淨係上個財年已經勁蝕近四億，再係咁燒銀紙法，遲早連洋老闆都頂唔順閂水喉。
小氣候惡劣，大氣候更加係「時不我與」。漢奸黎多年來反中亂港，搞風搞雨，愈來愈多人睇清佢邪惡面目，呢嗱，壹淫媒呢幾日博老命鼓吹七一上街，結果上街人數創歷史新低，就知愈來愈少市民聽佢支笛。仲有就係國家領導人講到明，一國兩制下國家安全底線觸碰不得，講緊嘅咪就係漢奸黎之流嘅賣港賊咯。條肥佬一早喺海外購置大量物業，慌唔係為將來着草鋪定後路咩。
當然喇，對於天主教徒嘅漢奸黎嚟講，原唔原諒佢係上帝嘅事，家陣最緊要係有人帶佢去見上帝。新一屆政府上任三把火，照計冇理由繼續好似上屆政府咁扮晒鵪鶉，對漢奸黎涉及嘅黑金案同佔中案拖得就拖啩。話時話，「假自僱」呢單嘢明顯侵害勞工權益，勞工處處長陳嘉信連日來被全城「通緝」，點解到依家都未見影，唔通要市民掟西瓜落海尋人至肯蒲頭？
國家領導人教落︰「為官避事平生恥」，陳處長呀陳處長，你究竟知唔知個「恥」字點寫o架？