廣告話齋︰「打波先嚟落雨，唔通連個天都唔鍾意我？」有時啲嘢黑起上嚟就係咁，好似港珠澳大橋香港段咁，甩漏嘢鑊鑊新鮮鑊鑊甘，繼人工島飄移、海堤崩塌後，連填海用嘅鋼圓筒亦驚爆移位醜聞，唔通連個海都唔鍾意香港？
話說大橋香港段口岸人工島舊年被揭發有廿二個鋼圓筒向外移位三米以上，佔總數達四分之一，雖然事後已經進行加固工程，點知問題冇解決不特止，仲進一步惡化。本報踢爆，舊年至今再有多兩個鋼圓筒出現較嚴重移位，後果可大可小。有關注團體就講得啱嘞，人工島一再出現飄移，工程進度勢受影響，完工通車日期隨時凍過水；更令人擔心嘅係，大橋同人工島上建築物結構受損，就算醫得番將來亦有大把手尾跟，閒閒哋都要搞幾個月。
每次爆大鑊，路政署例牌又係輕描淡寫，大派定心丸，強調顧問工程師一早已預計填海地會出現向下沉降情況，對填海土地及海堤嘅結構安全並無影響喎。咁就好笑嘞，既然唔影響安全，當局又使乜臭屎密冚，係都要等到傳媒揭發至死死地氣承認，又使唔使急急腳補鑊？所以話，官老爺講嘢，真係信佢一成，雙目失明。
講到補鑊，又係一筆糊塗帳。據講港府同承建商就鋼圓筒加固工程拗唔掂數，部分要由港府硬食。承建商疏忽大意，結果又係納稅人埋單，本來已經好唔公平，最離譜係香港口岸工程費用差不多耗盡，路政署惟有挖東牆補西牆，挪用屯門至赤鱲角連接路工程費用。係人都知連接路工程本身亦係問題多多，容乜易第時追加撥款，又搵第二個工程填氹，如是者周而復始，沒完沒了，結果只會係惡性循環。有業界人士甚至質疑，路政署做法違反「專款專用」原則，有違法之嫌。
真係諗極都唔明，同一條大橋，同一片海洋，珠海同澳門段都有人工島，點解人哋就平平安安，而香港段就多災多難，唔通海龍王都揀人嚟恰？嗱，港產官僚就最buy呢套，次次基建工程出狀況，唔係賴天氣唔好就係賴地層太硬，千錯萬錯都係老天嘅錯。大家有眼見，大橋工程展開以來一波三折，無論係工業意外傷亡枕藉，抑或係石屎檢測弄虛作假，根本唔係咩「天災」，而係當局監管不力，胡混度日引發嘅「人禍」。
點講都好，香港處理大型工程嘅表現，同內地甚至澳門相比此消彼長，相形見絀，係不爭嘅事實。正如觀察一個人嘅氣色可知吉凶，一個城市嘅興衰亦係有迹可尋，有人話香港遲早變成中國三流城市，決非危言聳聽。