政情：陳岳鵬學生Look去哈佛開學
早前向特首請辭嘅政制及內地事務局副局長陳岳鵬（Ronald），遠赴美國哈佛甘迺廸學院修讀公共行政碩士課程，原來佢已經開咗學嘞。前日見佢嘅Facebook（Fb)分享咗幾張身處講堂內嘅圖片，見佢着住恤衫孭住個黑色背囊，變番學生Look，再加上佢嘅招牌笑容，相信校園生活應該好愉快。
Ronald喺本月十六日起休假，本月二十八日離任副局長職務，以便趕及本月底開學。實際上，佢喺本月十九日已啟程赴美，當日喺Fb上載咗一張搭乘飛往美國航班嘅照片，仲留言「無官一身輕」，完全表露佢走出「熱廚房」後嘅心情。
娥姐留言叫到埗報平安
唔知道佢同舊年參選立法會新界東地區直選候選人陳玉娥（娥姐）嘅交情有幾深厚，但娥姐亦曾喺Ronald嘅Fb留言，叫Ronald抵達美國後，隨即電郵或WhatsApp佢，仲祝佢一路平安添！雖然唔知Ronald抵埗後有冇聯絡娥姐，不過相信喺佢嘅Fb睇到呢幾張相，娥姐都應該安心喇！
Ronald早前曾強調赴美深造嘅決定同特首選舉結果無關，而係眼見世界發展太快，必須裝備好自己，「離開是為了走更遠的路」。佢又唔排除將來重返政府，「他日若再回來，就是完整的旋轉門」，切合高官問責制嘅精神。