政情：離任做番老本行 馮煒光隨時踩雷
政府即將換屆，現任問責官員離職後要任職其他工作，須經前任特首及政治委任官員離職後工作諮詢委員會批准，而特首辦新聞統籌專員（IC）離任後工作，政府亦須問及委員會意見，才決定是否批准。委員會尋日公布資料顯示，IC馮煒光離任後，將會做番老本行，即係開公關顧問公司，又會做報紙專欄作家，政府雖然批准佢嘅申請，但就要佢遵守委員會提出嘅多項限制，包括禁止佢做好多同政府有關嘅工作。IC接觸咁多政策，睇嚟馮煒光將來都要相當小心，否則隨時出事！
委員會建議馮煒光從事有關工作時，要遵守若干規限，包括不得參與有關政府事宜嘅游說工作、不得競投特首辦或新聞處的任何合約、不得就其客戶與政府嘅往來提供任何顧問服務、不得透露任何機密或敏感資料，以及喺文章中，不得包含與佢作為專員期間任何相關而可能會令政府尷尬嘅內容等等。
咁多規限，仲可以做啲乜？馮煒光話唔會做政治公關，只會做財經公關，自己喺財經公關界超過二十年，係老本行，又指前律政司司長黃仁龍接觸更多機密，都係回去做老本行。被問到擔唔擔心將來部分工作會被批評同以往做IC得知嘅資料有關，佢就話根據規定唔會洩密，而本港上市公司，尤其係中型公司關心嘅係港交所、證監會同財經傳媒，政府政策對中小型上市公司係太遙遠。
未知PR公司今年成唔成立到
佢又話未知公司可唔可以喺今年內成立，目前擔心開唔開到銀行戶口，因為全球所有政治人物都好難開戶口。唔知佢會唔會考慮下用番自己現有嘅戶口處理呢？
另外，委員會又公布，食物及衞生局局長高永文及環境局副局長陸恭蕙離開政府後，將會分別擔任私人執業醫生及香港科技大學兼任教授。據了解，陸恭蕙任教嘅係環境研究所，目前仍未落實會教邊科，仍要同其他教授商討，而相關嘅工作並無受薪。委員會認為高永文及陸恭蕙遵循相關規限下，工作唔會構成任何潛在利益衝突，亦唔預期會引起負面公眾反應或公眾觀感。