中環出更：9萬飛行里數過期 陳家強大嘥鬼
唔少人搭飛機旅行公幹都會儲飛行里數以兌換機票，政府高官經常公幹外訪，儲儲埋埋啲里數應該都好和味。不過，原來有局長係飛行里數大嘥鬼，儲埋啲里數唔去換機票，仲搞到啲里數過晒期添！但呢個大嘥鬼並唔係經常周遊列國嘅教育局局長吳克儉（吳得掂），而係財經事務及庫務局局長陳家強。
黃錦星當捐款畀減排項目
尋日有報道指多名即將卸任嘅高官仍有飛行里數尚未兌換，當中包括有廿一萬六千里嘅吳得掂、及有十九萬六千多里嘅陳家強，而政制及內地事務局局長譚志源同財庫局副局長劉怡翔就有八萬多里。雖然未兌換機票，吳得掂嘅里數將會留畀教育局或捐贈予慈善團體。之不過，陳家強嘅里數已有部分過期，依家只得番唔夠十一萬里，換言之，即係約有九萬里數嘥咗。至於成日叫人唔好做大嘥鬼嘅黃錦星都知慳識儉，透過航空公司碳抵銷計劃，將約一萬四千里用作捐款畀減排項目。
而喺任內申領咗最多里數嘅就有前財政司司長曾俊華（鬍鬚曾）、商務及經濟發展局局長蘇錦樑同埋運輸及房屋局局長張炳良，三人分別申領咗約六十萬里、四十五萬里及廿三萬里。不過鬍鬚曾喺○七年已任司長，多里數都唔出奇。
卓妮