中環出更：難忘酒王楊章桂芝一試傾心
香港酒業總商會早前舉辦周年慶典，卓妮喺晚宴上見到香港專業及資深人員協會會員楊章桂芝（Cindy），講起飲酒，從事旅遊業多年嘅佢經常四圍飛，飲過咁多唔同地方嘅酒之後，佢始終心繫當年喺澳洲住嘅期間所飲嘅酒王。
Cindy話廿幾歲嗰陣最愛飲香檳仔，容易入口價錢又便宜。直到後來喺澳洲住嘅時候，經常同朋友去拍賣酒行，就愛上咗紅酒喇！佢仲好回味當年喺澳洲飲過嘅八二年Petrus，形容係一試傾心，印象非常深刻，酒香非常有層次兼入口香醇至今難忘。佢仲話當時澳元匯率約一兌四，只需一千八百澳元就買到一支，即係逾七千港元，真係好抵咁話，事關依家已升到三萬幾、四萬元嘞。呢日佢喺晚宴上就以近兩萬元投咗支唔同年份嘅紅酒返屋企，但佢話自己酒量不深，所以同朋友分享最適合，仲已經即場約埋朋友一齊重溫呢種味道添！
張宇人話係鍾意飲個氣氛
立法會飲食界議員張宇人就話鍾意飲酒其實係鍾意飲個氣氛，最開心就係一班朋友聚埋一齊，佢仲透露後生時都試過飲醉兩次，其中一次係喺外國讀書時有個朋友生日一齊慶祝，加上年輕時唔熟酒性，一時太開心就飲醉咗，不過試過之後好快佢就學識節制，依家溝酒都冇咁易醉，但知道差唔多就會識停喇！
同場仲有香港酒業總商會會長兼理事會主席蘇又萍、副會長鍾鑑明同另一立法會議員謝偉俊。謝偉俊話做律師好多時壓力都會比較大，面對及處理唔同案件時，亦難免要花較多精神，所以以前佢哋收工好多時都會鍾意飲番幾杯嚟放鬆心情，好似清酒比較淡容易入口又甜甜哋，想飲多少少嘅時候都唔怕喎。
卓妮