人稱「漢奸黎」嘅壹傳媒老闆黎智英曾經講過，無論幾多錢都唔會出賣淫媒，話費事第日仔女同人講「我老竇好有錢但係係契弟」喎。家陣漢奸黎未賣盤先賣員工，簡直係契弟中嘅契弟，點向仔女交代？
話說壹淫媒近年經營不善，旗下刊物不斷縮水，淨係上個財年就蝕咗近四億元，漢奸黎為咗止血，不惜擺員工上枱，計劃對《蘋果日報》、《壹週刊》及台灣《蘋果日報》等推出所謂「自願離職」及「鼓勵創業」方案。三歲細路都知，所謂「鼓勵創業」，實際上係將部分新聞製作工序外判，美其名曰「自僱」，實際上係裁員減薪，諗縮數去到咁盡，仲有冇再離譜啲呀！
講真，逼員工「假自僱」係無良僱主常用陰招，漢奸黎以為可以瞞天過海，未免太侮辱公眾智慧。正如立法會議員話齋，壹淫媒逼員工自願離職變自僱，等於剝削員工遣散費同長期服務金等應得權益，係「無良老闆嘅典範」。
唔知係咪物傷其類，兔死狐悲，平時一對住壹淫媒就腳軟龜縮嘅記協，今次亦罕有發表聲明回應，雖然又係無氣無力，連半句譴責都冇，但總算識得呼籲行家暫時唔好接受方案。記協邊個養起，唔使多講，有人自身難保，分分鐘閂水喉，你話唔驚就假。再講吖，如果「假自僱」呢啲屎橋真係work，個個有樣學樣，遲早燒到自己嗰疊嘅咋！
漢奸黎呢鑊辣（興）員工，莫講話畀人鬧「契弟」，斷估令壽堂呢幾日都好唔得閒。工會尋日同管理層開會，結果對方毫無商量餘地，強調推行外判政策事在必行。唔怪得工會鬧爆，話承包制下外判商員工同樣工作量但收入減少，即係變相減薪；話就話主管會照顧下屬，實際上係將企業責任同解僱壓力轉嫁部門主管，等於將前線員工「賣豬仔」。至於漢奸黎，佢老哥一早飛咗去台灣撲火。事關當地新聞記者協會除咗炮轟「假自僱」方案損害勞工權益，企圖規避相關法律責任，仲要求台灣勞工局主動介入添。查實計功夫茶話齋，對住呢挺無良僱主，唔止台灣當局要跟進，香港勞工處一樣唔可以輕輕放過吖。
當然喇，漢奸黎近排黑氣纏身，絕對唔止淫媒前景不妙咁簡單。佔領行動搞手相繼落鑊，輪都輪到佢呢個最大金主兼幕後黑手；佢老哥涉嫌恐嚇本報記者單嘢，仲有好多手尾跟，再加上盛傳狂人特朗普上台後「狗餅」減量，可以話係內外交困，窮途末路。漢奸黎一早喺英、美、法等地購置大量物業，反而喺香港就租屋住，連「根」都冇，慌唔係狡兔三窟，為滅亡着草之日作準備咩！
始終都係嗰句，前人種禍，後人遭殃。漢奸黎做埋咁多陰騭嘢，居然仲好意思講子孫後代，唔通佢冇聽過「人從宋後少名檜，我到墳前愧姓秦」？