政情：月（逗）16萬元酬金 張國鈞謙稱小中產
政府前日公布新一屆行政會議非官守成員名單，當中包括民建聯副主席兼立法會議員張國鈞，但同屬民建聯嘅現任行會成員葉國謙又唔肯退休，變成該黨同時擁有兩名行會代表。張國鈞尋日接受電台訪問時，繼續死撐民建聯唔係霸道，佢又形容自己係年輕、專業嘅「小中產」，同葉國謙嘅背景有別，可將不同聲音帶入行會。張國鈞本身已係立法會議員同區議員，入埋行會後變成「三料議員」，每月支取納稅人近十六萬五千元酬金，自稱「小中產」真係謙虛咗啲。
林正財指頂得住「熱廚房」
另一行會新貴安老事務委員會主席林正財表示，過去一直有同候任特首林鄭月娥合作聯絡，大家理念相近，所以對方一邀請佢加入行會，佢考慮咗幾日就答應。佢又形容依家政府「熱廚房」嘅溫度仲算抵受得住，未到「火山爆發」嘅程度喎。
已夠鐘攞長者卡嘅新任行會成員工聯會黃國健就話，過往一直做開工會領導同立法會議員，經常批評政府，依家加入行會難免有少少角色衝突，任命一宣布佢已感到壓力。如果將來政府同行會嘅決定，與工聯會同勞工界嘅立場唔同，佢可能會喺立法會投票時避席。