政情：民記要靠兩小花呃Like
青年民建聯（青民）今個月初選出新任委員會成員，其中兩位新任副秘書長，包括二十九歲嘅植潔鈴同二十五歲嘅賴嘉汶 ，外貌上最為吸睛，喺Facebook引來唔少關注。主席顏汶羽就話，兩位小花吸Like強勁，又話為咗令青民人數顯見增長，考慮由兩位小花做發言人喎！
顏汶羽話，一直有留意唔同成員喺Facebook嘅like數以及可接觸人數。目前最多人睇嘅係賴嘉汶嘅貼文，超過四千一百人次，排第二位嘅植潔鈴都有超過三千人次，顏汶羽自己只有不足一千人次，難怪佢笑稱可見靚女嘅威力驚人。
擬委任做青民發言人
顏汶羽話佢哋一直考慮設立青民發言人，若然兩位小花真係咁受歡迎，就不如由佢哋出任，一來可以當作訓練，又可以成為生招牌。
講到做青民嘅生招牌，兩位小花都顯得尷尷尬尬。有成員就大爆植潔鈴目前係單身，建議追求者可以考慮加入青民，以便親近女神咁話。植潔鈴同賴嘉汶目前分別服務屯門同埋小西灣區，植潔鈴主要負責家庭同婦女事務，而賴嘉汶就會關注福利同兒童事務。