中環出更：物流式煮餸 王嘉恩唔怕大鑊飯
放假喺屋企同家人一齊落廚煮嘢，都係唔錯嘅親子節目。早前油尖區賢毅社有份主辦一項親子入廚樂活動，做物流生意嘅油尖區賢毅社名譽會長王嘉恩都有到場，佢笑言鍾意煮畀一大班朋友食，試過煮八至十人分量。唔少人一諗到要煮畀咁多人食就投晒降，不過王嘉恩就冇有怕，佢話會預先叫工人擺好晒啲碟，一煮好就上菜，形容自己做開物流，煮飯都流水作業式喎！
星級廚媽梁雅琳就夥拍食物及衞生局局長高永文一齊炮製黑松露野菌鮮蔬蛋網包飯，高永文笑笑口話，以為大會請佢做主禮嘉賓，點知原來係要煮嘅，啲人以為佢識煮嘢，但其實佢淨係鍾意食，只識煮兩三道菜，事關每個人屋企都總有幾味餸街外食唔到嘅，佢驚失傳先至跟阿爸學咗煮炆筍及鹹鮮魷蒸肉餅咋！
陳岳成面授小朋友打牛丸
卓妮見高永文煮嘢時雞手鴨腳，倒啲飯落鑊嘅時候，仲連隻紙碗都跌埋落去，相當搞笑。佢仲實行食得唔好嘥，將拍檔煮得唔夠靚嘅蛋網食埋落肚，又真係幾為食。
同場仲有油尖區賢毅社委員歐陽鳳盈、管理食肆嘅何健同埋做肉丸生意嘅陳岳成等人。陳岳成話有開班教小朋友打牛丸，佢除咗整牛丸之外，最拿手就係煎牛扒。佢教路先猛火煎兩面鎖住肉汁，再慢火煎到自己鍾意幾成熟為止。何健就稱父親做廚出身，但甚少食到爸爸煮嘅菜，而佢自己就諗住學吓西餐，將西式嘢食融入中菜，好似佢哋早前推出水耕菜沙律，都幾受茶客歡迎。
卓妮