中環出更:午餐肉含抗生素李家仁照食

近期消委會發現有午餐肉被驗出含有獸藥殘留抗生素,令人擔心。早前卓妮喺活動上見到李家仁醫生,佢就話唔會因為咁而怕咗唔食肉,指抗生素一般需要儲存喺低溫,遇到高溫會失效,所以煮熟咗其實唔需要太擔心。香港中華總商會(中總)副會長李應生就話飲食要均衡,唔好長期偏食一樣嘢,咁風險就會低好多。

早前中總舉辦會員聯歡晚宴,同兒科醫生李家仁講起動物服食抗生素嘅問題,李家仁認為本身抗生素對人類好有作用,尤其港人生活空間擠迫,唔似外國人咁病咗匿埋喺屋企放假,好多港人習慣感冒都返工返學,好易交叉傳染,呢個時候抗生素就默默發揮作用。而飼養動物的空間好多時亦非常密集,所以亦唔難聯想到飼養動物用到抗生素,不過有關數據佢唔清楚,難以評論,但佢個人就唔會因為咁而避開唔食肉類,但生冷嘢或刺身就始終少食為妙。

鍾偉平化驗食物不求人

中總地區事務委員會主席鍾偉平本身經營酒樓,佢話採購食材唔可以單靠睇證書同政府化驗,自己都要清楚食物有冇問題,所以佢哋化驗不求人,自己喺香港同東莞設立兩個化驗中心,長期檢查購入嘅食材有冇異樣。佢又認為抗生素、農藥同食用色素本身使用係冇問題,但必須符合國際標準,唔可以超標。

做中藥生意嘅李應生指除咗西藥,唔少中藥都有近似抗生素嘅作用,好似蛇膽咁,都會被用作消炎止痛,而中藥好多時係複方配搭,混合多種藥材互補不足。啱啱跟中總團去完梧州返港嘅副會長袁武就諗起當地好多金錢龜,但佢怕苦所以冇食到喎!

卓妮

第一手消息請下載on.cc東網iPhone/iPad/Android/Windows Phone Apps