好快又到七一，亦即係回歸二十周年嘅大日子，本來係可喜可賀嘅，可惜一睇新班子嘅陣容，即刻令人一聲嘆息，熟口熟面唔在講，最大鑊係司法刀把子依然掌握喺爭議多多嘅袁國強手裏，香港想撥亂反正都幾難。
大家有眼見，袁國強連同佢一手提拔嘅刑事檢控專員楊家雄不嬲同一鼻孔出氣，對於任內發生嘅佔領之亂隻眼開隻眼閉不特止，仲滿口歪理，最經典就係遲遲唔起訴佔中主要搞手，原因係「證據太多」喎，簡直侮辱公眾智慧；楊家雄仲叫人唔好為檢控劃下死線，爭在未叫公眾收嗲咋，好大嘅官威囉。
好喇，醜婦終須見家翁，尋日新班子亮相，聽吓袁國強點講吖。佢話喎，檢控佔中同處理其他刑事行為一樣，會依照檢控守則及相關法律處理，唔存在部分傳媒所講，話律政司唔做嘢，或者有另一個處理方法喎。佢仲強調所有刑事檢控科同事都係依法辦事，唔會因為政治原因而左右檢控決定添。
依法辦事？檢控唔會受政治原因左右？講就好聽囉，但咁點解佔中一案拖咗兩年幾就快來三年仲喺度拖泥帶水？點解到目前為止淨得九個佔中搞手被檢控咁大把，另外近四十名搞手仲係逍遙法外？尤其係壹傳媒老闆漢奸黎，仲囂張到走去美國也文也武唱衰香港添。打蛇七寸，擒賊擒王，佔中落幕嗰陣，一群反對派政客將漢奸黎團團圍喺核心，呢幅「群醜拱衞」圖好清晰話畀大家知邊個係佔中禍首，但萬萬諗唔到，有份拱衞漢奸黎嘅唔止嗰幫收咗黑金嘅政客，仲有律政司添。
反觀小市民涉嫌犯法就唔同講法，律政司手起刀落，話檢控就檢控，話起訴就起訴，打針都冇咁快，最近發生嘅一蚊紙皮阿婆事件就係例證嘞。仲有喎，佔中期間發生嘅七警案、義士擲豬雜案，案中被告一早就判刑收監，完全冇情講。一樣違法兩樣處理，律政司抓小放大，緩急不分，個心向住邊面，係咪雙重標準、欺軟怕硬，心照喇。
講起就激氣，律政司理應維護法治，偏偏帶頭姑息養奸，話袁國強同楊家雄係人民公敵都便宜咗佢哋喇。當局老虎屁股唔敢摸，連蒼蠅都唔敢拍，難怪愈來愈多人視法治為無物。呢，最近咁多「詐彈案」，搞到警方疲於奔命，家陣知點解喇。
堡壘最易從內部攻破，香港七國咁亂，洋奴漢奸氣燄囂張，你話政府冇內鬼就假咯。點都好，新政府要修補撕裂重建和諧，徹底清算佔中就唔可以再拖，律政司會唔會由人民公敵進一步升呢為歷史罪人，大家火眼金睛（目及）住嘞。