特區政府新班子尋日敲定，但係副局長同政治助理仲未確定，盛傳教育工作者聯會副主席、福建中學（小西灣）校長蔡若蓮會出任教育局副局長，成為候任教育局局長楊潤雄嘅副手，佢未上任就已經畀一班反國民教育嘅議員鬧爆，插到變咗箭豬咁。仲記得四年幾前，吳克儉（吳得掂）上場做教育局局長，隨即爆發一場反國教風波，吳得掂都被插到體無完膚，睇怕佢都感同身受，唯一慶幸嘅係佢嘅任期只係剩番個幾禮拜，好快就甩難，唔使再畀人插，國教之後發展係點，佢都只係隔岸觀火啫！
