政情：轉發「荔枝食死人」？張華峯急發聲明闢謠
喺內地有一則已經被謠傳多時嘅舊聞，指荔枝含有類似食肉菌嘅病毒，呼籲民眾要加強警惕，盡量避免進食荔枝，但至今仍有人誤信傳聞，甚至繼續將謠言廣傳！
原意想提醒大家小心求證
立法會金融服務界議員張華峯（肥老闆）早前亦收到這則消息，之後亦有向朋友轉發，網上更瘋傳一則肥老闆溫馨提示嘅電話短訊，指荔枝有好多蟲「國內人士死很多」，更呼籲民眾為咗健康要少買荔枝，但肥老闆尋日中午發出聲明，指自己並冇撰寫有關訊息。
有關訊息被廣傳後，肥老闆急急喺Facebook發聲明補鑊，同嗰則訊息劃清界線，指自己只係本於提醒大家小心求證嘅心態，將有關訊息轉發到「自己的朋友圈」，並沒有就此向公眾人士作出任何「溫馨提示」，更呼籲大家唔好再轉發嗰則訊息，以免引起任何不必要嘅誤會。之不過，作為議員向朋友轉發訊息前，係咪都應該小心求證一番，避免引起公眾誤會呢？
肥老闆回應事件時就話自己好鍾意食荔枝，唔擔心荔枝有食肉菌，到咗七、八月荔枝當造時就會再食荔枝，但自己就唔會食太多，因為糖分太高，自己亦太肥喎。