政情：阿基永續參選網民誓言一票不投
民協前晚通過推薦前黨主席馮檢基（阿基），出戰因青年新政游蕙禎被取消議員資格而須進行嘅立法會九龍西補選。舊年喺新界西敗選嘅阿基，似乎喺立法會陰魂不散，現年已六十四歲嘅佢今次又再繼續堅持參選，拒絕交棒畀第二、三梯隊，無論喺黨內黨外都引起強烈反彈。民協喺社交網站Facebook設立嘅專頁更遭洗版，有網民大翻佢喺上屆立法會換屆選舉，空降到新界西參選「鎅票」累死多名泛民盟友嘅舊帳，表明「一票不投馮檢基」，仲預告民協將喺補選後亡黨滅黨添！
有網民指民主黨、公民黨等多個泛民政黨，以及大部分建制派政團，近年都已成功交棒畀年輕一代，惟獨係阿基死不交棒，導致該黨發展停滯不前，甚至倒退，大批中生代同年輕黨員先後退黨。大批網民前晚起喺民協Facebook留言批評有關決定，炮轟阿基戀棧權位。有網民則「恭賀」民協成功交棒，但卻係「交棒給上一代」。
阿基其後喺專頁回應，否認自己戀棧權位，否則佢唔喺一二年立法會選舉轉戰超級區議會議席，以及喺一六年冒險轉戰新西直選。佢又形容今次補選係民主派與建制派同民建聯嘅對決，呼籲其他泛民黨派盡快協調一人出戰。
被質疑又「鎅票」
不過，阿基嘅回應隨即惹來更多批評。多名網民指佢舊年空降新西只起到「鎅票」作用，累死咗工黨李卓人等多名泛民盟友，質疑佢今次參加補選同樣只為「鎅票」，最終只會益咗建制派同民建聯，認為如果阿基真係為咗大局着想，應該好似該黨成員何啟明喺舊年超區選舉咁自行退選。有網民更揚言「一票不投馮檢基」，並預告民協將於補選後亡黨滅黨。
同時亦有民協中人不滿阿基利用民協嘅Facebook帳戶回應外界批評，而唔用自己嘅個人帳戶，令人覺得阿基即等同民協嘅「不良印象」。