中環出更：梁立德畀蜂螫出好皮膚
香港食品委員會早前舉行新一屆會董就職典禮並頒發「百年食品品牌」，家族生產天然蜂產品嘅養蜂場第三代傳人梁立德（Edmund）都有到場攞獎。Edmund細細個就喺養蜂場出入，笑稱自細被蜂螫到大，不過見佢身上冇乜「戰績」，佢解釋話被蜂螫唔會有疤痕，皮膚仲愈螫愈好添！
Edmund笑笑口話被蜂螫係好嘅，事關腫完之後傷口會完全消失，仲因為蜂毒嘅刺激而令皮膚變靚，最近蜂毒面膜大行其道就係呢個原理喇！佢諗起有一次搬養蜂箱時，箱底突然穿咗，啲蜂飛晒出嚟，佢即刻被蜂包圍攻擊，感覺好似萬箭穿心。結果佢腫到連眼都封晒，成個人呈半昏迷狀態，嗰次係佢被蜂螫親最嚴重嘅一次，但佢從未試過睇醫生，話瞓幾日就會好番晒喎。
當日到場嘅仲有中華出入口商會會長張學修、香港餐飲聯業協會會長陳首銘等政商界名人。新主席陳建年話新一屆會董會改行主席會長制，即以主席取代會長，主席退任後就出任會長兼永遠榮譽會長。希望任內繼續提升食品衞生同業界質素，推動業界發展。
倪伯嘉鍾意食手工蛋卷
轉頭見到台灣經濟部駐港代表遠東貿易中心主任倪伯嘉同台北貿易中心主任巫英臣，佢哋派駐香港未夠一年，但都已有最愛嘅小食。倪伯嘉好鍾意北角一間手工蛋卷，試過排隊四小時先買到，而巫英臣就鍾意遊客必買嘅人氣曲奇餅，話配台灣茶就一流喇！
卓妮