政情：不滿新丁做主席 建制要拉邵家臻鄺俊宇落台

建制漏招 劉小麗「執雞」

有資深建制派透露，建制陣營對於新丁「破例」出任主席非常不滿，下一個立法年度會期將會用盡方式將邵、鄺拉落台。

每屆立法會會期開始，民主派同建制派都會出現事務委員會霸位戰，今年建制派就釋出幾個委員會主席，包括衞生事務委員會、福利事務委員會等畀民主派議員。建制派原本以為，民主派會安排曾經做過主席嘅工黨張超雄做福利事務委員會主席，點知張超雄拒絕，苦無人選之下，邵家臻同鄺俊宇就打破新丁無得做主席嘅慣例，分別當選福利正副主席。

之後建制派仍然無吸取教訓，喺墟市事宜小組委員會選舉主席時再次漏招，因為出席人數不足而令新丁劉小麗當選主席，由於建制派眼中劉小麗嘅宣誓不符合標準，佢議員資格都成疑，咁都可以做主席令唔少人大跌眼鏡。

資深人士：至少換走邵

有資深建制派透露，建制陣營對於新丁「破例」出任主席非常不滿，有人提出要糾正失誤，仲話下一個立法年度會期同民主派傾正副主席時，至少提出換走邵家臻。邵家臻接受查詢時就話，覺得自己表現都中上，主持咗咁多次會議同公聽會都尚算順利，反問點解新仔就一定唔做得，佢又解釋民主派其實無意打破慣例，只係因為當時只有佢同鄺俊宇有意做福利事務委員會主席，先至有此決定。佢又話自己依家已經有一年經驗，若然以無經驗為由拒絕佢再任主席，唔太合理。

講到尾，其實建制派要求踢走邵家臻都係為啖氣，若然為咗兩邊和諧唔使再「冧友」，邵家臻都真係有機會成為犧牲品呀！