中環出更：無懼退黨潮 馮檢基永續選立會
青年新政游蕙禎、梁頌恆舊年當選立法會議員後觸發議員宣誓風波，被取消議員資格。兩人所屬嘅九龍西同新界東選區將舉行補選。喺舊年立法會選舉中敗選嘅民協馮檢基（阿基）尋晚通過民協黨內初選，將代表民協參加九龍西補選。早前有民協成員表明若果阿基參選將會退黨，但仍無阻阿基出選決心，永續參選果然唔係傳說。
話民協新舊交替做得唔錯
民協尋晚就九龍西補選舉行黨內初選，共有廿四人有份投票，但出席投票只有十九位。阿基喺今次初選唯一參選人嘅情況下，佢獲得廿四票中逾三分二票數，通過黨內初選。阿基就話佢只係代表民協出選，並非民主派，促請民主派就補選舉行初選，選出代表民主派嘅候選人。
對於有黨員曾經講過若果阿基參選就退黨。阿基話個別成員嘅決定係控制唔到，又話補選係泛民及建制之爭，民協唔能夠為咗新舊交替而搵新人去選，一定要搵最具勝算嘅人參選。佢仲死撐民協新舊交替方面已做得唔錯。
被問到過往民主派喺選舉中都難以協調，民協主席施德來就話，立法會選舉係比例代表制，補選係單議席單票制，性質唔同，強調今次係泛民與建制之爭，應做好協調喎。
卓妮