香港地「上車難」就係人都知，其實「泊車難」問題一樣唔嘢小，特別對搵食車司機嚟講，搵唔到車位焗住周街泊，食一張牛肉乾分分鐘白做，食兩張直頭要倒貼，都咪話唔閉翳。
咁就難怪政府之前建議違例泊車牛肉乾罰則大幅提高一半，搵食車司機即時嘈到拆天，雖然當局之後褪軚，將加幅減半，但業界仲係唔收貨。尋日立法會舉行公聽會，幾乎淪為運輸業團體控訴大會。有直通巴士司機因為違泊，被迫留喺車內，直到深夜確保冇警察抄牌至敢返屋企，搞到精神壓力超大；亦有業界批評政府收回爛地停車場短期租約，加上爛地停車場好多都將車位租畀私家車，令商用車車位買少見少。
講真，香港地路窄車多，街邊泊滿大型車輛，又確係幾擾民，加強執法本身無可厚非，特別係嗰啲貪小便宜連咪錶錢都慳嘅司機，罰重手啲當益吓庫房都好。搵食車司機大佬就唔同嘞，一日唔轉行一日都要搵位泊車，增加罰款只會加重佢哋負擔，根本無助解決問題。
好簡單啫，除非他日科技進步到發明虛擬汽車，可以停泊喺雲端上，否則有幾多車輛就要有幾多泊車位。可惜吖，港府九五年完成《泊車位需求研究》報告後就闊佬懶理，直至十幾年後先再作更新，期間仲不斷降低新落成建築物車位比例，又收回多個市區露天停車場，泊車位嚴重供不應求，唔爭崩頭至奇。反觀紐約、東京等大城市，靈活應變，多管齊下，透過興建機械式多層停車場，以及利用互聯網科技進行配對等，成功紓緩問題。
泊車位不足問題只係表面嗰浸咋。一方面車輛不斷增加，另一方面道路建設蝸行牛步，好似中環灣仔繞道咁，起咗N年都未通車，依家又爆出石屎樣本檢測造假醜聞，玩吓手又唔知要拖多幾耐。面對塞車問題，官老爺冇乜符弗，一味識得向錢看，唔係增加牌費就係加罰牛肉乾，政府將規劃失當責任轉嫁無辜市民，司機大佬唔(興)就假。
一滴水可以睇穿整個世界，急症室大排長龍，皆因公立醫院人手不足，政府唔增加資源，反而大手加價，向基層市民開刀，簡直本末倒置。同樣道理，食環署惡吏鐵腕對付露宿者，淋水清場沒收家當，無所不用其極，除咗手段兇殘冷血，更加係治標不治本。試諗吓，如果唔係港府拓土建屋不力，又點會咁多人住豬欄牛棚劏房甚至瞓街吖，你估真係貪風涼水冷咩。
港產官僚鋸箭大夫水平逗美國總統人工，難為有人仲嫌加得唔夠，厚顏無恥成咁，成個社會民怨沸騰，家陣知點解喇！