中環出更：張文光攞番回鄉證 返台山尋根
中央政府喺舊年十一月放寬部分政界人士入境限制，重新畀佢哋申請港澳居民來往內地通行證，即「回鄉證」。支聯會副主席蔡耀昌早喺舊年十二月已申領回鄉證並成功往返內地，而支聯會常委張文光亦喺今年四月中申領回鄉證，早前仲返咗家鄉台山尋根。
雖然張文光一直都冇回鄉證，但其實佢喺出任立法會議員時，曾經隨立法會外訪團前往內地考察，例如廣州外訪、參觀上海世博等，而一四年亦曾到深圳出席政改座談會。
張文光回覆查詢時話早喺今年四月中已申領回鄉證，但拖到近期先出發，而佢嘅第一站就係到家鄉台山，成功搵到荒廢咗嘅祖屋，更喺當地搵到一名認識其亡父嘅婆婆，亦去過其亡父小學畢業嘅台山大塘村蘆溪學校。不過，佢原本打算前往母親家鄉東莞，但因大雨而被迫放棄。佢話今次過關過程順利、全無阻滯，但暫時冇打算再返內地，若日後再返內地，希望去東三省睇下日本侵華痕迹。
申領冇上報民主黨
另外，張文光亦身兼民主黨中委，佢強調申領回鄉證係個人決定，該黨冇要求成員作出上報，而佢亦唔知其他黨員有冇申領回鄉證。
卓妮