中環出更：摷煙變拔槍？何建偉越洋嚇親人
做善事少啲新意都唔得，除咗要諗計吸引善長捐款，仲要用得其所，切合受助者需要。仁愛堂日前舉辦全年大型節目巡禮，其中包括探索之旅，卓妮同總理何建偉講起去冷門地方旅行，佢自爆喺底特律發生摷煙變拔槍嘅嚇人事件。
因為做生意不時要四圍飛嘅何建偉，曾試過幾次有驚無險嘅事件，話說有次喺底特律一間快餐店門口，佢話當時想喺褲袋搵包煙，前褲袋搵唔到於是就伸手喺後褲袋搵，點知佢一做呢個動作就嚇到門口架車上兩個黑人即刻大叫兼開車走人，估計對方誤以為佢嘅動作係拔槍喎，諗番都覺得好笑。
喺仁愛堂今年舉辦嘅活動中，其中探索之旅亦甚矚目，今年佢哋嘅海上絲路探索之旅，計劃帶一班有志投身環保行業嘅高中生，遠赴印尼蘇拉維西島，探討點樣喺經濟發展與生態環境之間作出平衡。
赴極地探索 李愛平籲練體能
主席李愛平話有多個活動都係首次舉辦，包括喺中環海濱活動空間舉行大型嘉年華，以及公開名牌慈善義賣等。而仁愛堂近年每屆都會舉辦探索之旅，曾帶學生赴多個極地景點，連佢都覺得非常吸引，但佢就話去呢啲地方要先練好個人體能，而佢今年要做主席須同時間兼顧多個活動，惟有等下次先有機會跟隊喇！
副主席羅台秦、陳鑑光、潘俊彥、總理李穎妍同何倩儀等亦有出席。除咗印尼，潘俊彥話佢會負責帶仁愛堂旗下學生免費去瑞士同德國兩個星期，學習最高端嘅酒店管理，希望可以做多啲職業導向工作，幫學生搵到有興趣投身嘅行業喎。
卓妮