早幾日掛八號波，打工仔滿心歡喜，以為有多日假放，可惜最後都係空歡喜一場。有啲筍工就唔同嘞，員工唔使「望天打卦」，鍾意幾時請病假都得，而且老細絕冇詐型，呢啲咪同人唔同命囉！
冇錯喇，功夫茶講緊嘅咪係康文署轄下嘅救生員囉，上星期又有救生員集體請病假，部分泳灘被迫關閉，搞到泳客掃晒興。講真，拯溺員工會幾乎年年泳季都會發起各式各樣抗爭行動，市民早已見怪不怪，工會同署方誰是誰非，外人亦好難講得清，之但係次次都搵着市民嚟搞，難免佛都有火，大部分「東方報業民意調查」受訪者狠批救生員以人命做籌碼，就係咁解。
每次救生員搞完工業行動，工會循例做吓樣都會向公眾表達歉意，不過今次有啲唔同，工會發言人否認罷工之餘，強調救生員同時請病假係因為「人手不足，積勞成疾，身體作出訴求」喎。喂，「積勞成疾」會咁啱得咁蹺約埋一齊發作？咪呃人膝頭哥唔食辣椒醬好喎。大丈夫做得出就唔怕認，罷工咪堂堂正正罷工囉，佔了便宜仲要賣乖，盞令市民更加反感嘅咋！
當然喇，一個巴掌拍不響，救生員有恃無恐，皆因睇死康文署吹佢哋唔脹。對於集體工業行動，署方固然投鼠忌器，即使員工濫請病假兼夾擅自缺勤，一樣係束手無策。申訴專員公署舊年發表調查報告狂炳康文署管理不善，試過有救生員五年間攞超過五百日病假，問你怕未。睇吓港九拯溺員工會前主席郭紹傑，呢頭聲稱跌斷鎖骨請病假，嗰頭積極參與非法佔領行動，充當佔中金主兼壹傳媒老闆漢奸黎私家保鏢，鬼打冇咁精神，當局話就話會跟進，但到依家都未有下文，唔怪得救生員詐病文化根深柢固。
濫請病假都仲係小事，唔夠人手最多閉池謝客，最怕救生員返工冇靈魂，分分鐘死得人多。最近本報揭發多名救生員喺職員室內開P隊酒兼打邊爐，萬一有人飲大兩杯影響判斷，後果不堪設想。
講番救生員人手問題，工會其中一個講法係，政府救生員入職要求日高，但薪金冇相應提升，加上私人屋苑泳池競爭力高，令署方更難請人。功夫茶好想問句︰既然咁唔滿意依家份工，出面又咁好景，點解唔索性過檔私人機構搵真銀，會唔會有人郁啲就搞搞震，係人都買你哋怕呢？
冇錯嘞，伙記東家唔打可以打西家，老闆死了張屠戶亦唔需要食帶毛豬。正如有學者建議，對於違規救生員，當局應該執正嚟做，初犯警告，重犯炒魷，人手不足大可尋求外援替補，再唔係從鄰近地區班救兵，點都冇理由揸頸就命啫，吓話？