政情：一地兩檢局部執法？ 田北辰質疑張炳良亂噏

高鐵香港段通車日期一拖再拖，暫定出年第三季會通車，但點樣處理邊檢問題就仍然未有具體方案。張炳良早前表明，一地兩檢當然會牽涉內地人員依據內地法規來港工作，但工作就純粹係同清關有關，政府同內地部委做埋最後商討之後，就會盡快向公眾同埋立法會交代。

其實一地兩檢最大爭議，莫過於要喺香港境內，容許內地出入境部門執法。立法會鐵路事宜小組委員會主席田北辰就質疑有關講法等同喺西九龍總站實施局部執法，更指若內地相關部門同意的話，將會係超乎想像嘅一大讓步！但田北辰都話對呢個講法只係半信半疑，仲話中港兩地法例不一，如果有嫌疑犯通關嘅話，兩地部門可能會面臨尷尬局面添！

爛攤子勢留畀新政府

雖然上個禮拜都有內地護法呼籲香港人唔好自己嚇自己，表明中央無意趁機將內地法律喺香港全盤使用，仲話一地兩檢只係喺特定口岸區執行技術性法律，深圳灣西部通道亦已經有先例參考，希望香港人唔好將問題政治化。之不過，政界早已預期問題唔係三言兩語就能夠解決，最終都要視乎政府嘅具體安排。

反觀新政府即將上場，政界普遍相信律政司司長袁國強要留任處理埋一地兩檢，所以要張炳良喺政府換屆前交代最終方案似乎係不可能，呢個爛攤子最後都係要留畀新一屆政府接手處理。