中環出更：張宇人夢想 廿蚊紙印自己個樣
最低工資自二○一一年中實施開始，當年因提出將法定最低工資訂於時薪廿港元，對企業「殺傷力不大」而被諷「廿蚊張」嘅立法會飲食界議員張宇人尋日回望事件，佢笑指自己因此而對廿蚊紙有特別嘅親切感，更夢想有一日廿蚊紙會印上自己嘅肖像。
張宇人尋日接受一個電台專訪時，回想當年事件，再次重申自己由始至終都冇提倡將最低工資訂喺廿蚊，佢只係被傳媒問及最低工資訂喺廿蚊嘅睇法時，表達過咁樣嘅「殺傷力最小」，佢仲話工聯會嘅黃國健可以幫佢作證添！
自言最低工資事件曾令家人受壓
實際上，呢件事引起社會好大反彈，而公民黨（公文袋）亦特登整咗張印有佢肖像嘅紙牌廿蚊紙嚟諷刺佢，張宇人話事件曾帶畀家人壓力，就連黨友都急急同佢劃清界線，但事件卻因此成為佢嘅「公關教訓」。
雖然佢至今仍遭人諷刺為「廿蚊張」，但佢就話因而對廿蚊紙產生咗特別嘅親切感，仲有一個搞笑嘅夢想，就係有一日廿蚊紙會印上自己嘅肖像。其實當年公民黨（公文袋）特登整咗張有佢肖像嘅廿蚊紙嚟諷刺佢添，之不過，喺鈔票塗鴉係違法行為，張宇人嘅夢想根本就係一個不可能嘅任務！
卓妮