中環出更：旗袍要夠潮 布料係關鍵
近期唔少名人都鍾意着旗袍出席活動，傳統與時尚兼得，不過「潮」同「娘」往往只係一線之差，好考眼光。早前卓妮喺沙田馬場見到本地時裝設計師林春菊（Janko），做旗袍闖出名堂嘅佢就認為布料係其中一個關鍵，由建築師轉行做圖案設計師嘅李漢樑（Herman）則以電腦運算方式設計不同圖案嘅布料，深受一班時裝設計師愛戴。
沙田馬場尋日舉行一年一度嘅會員盃，一班女士因應主題穿着旗袍到場。其中Janko一身長衫裝扮非常特別，係以防水嘅風褸料所製，啱晒呢日落雨着，而斜襟位置嘅傳統鈕扣改埋做「啪鈕」，方便嘅同時現代感培增。
而身旁嘅友人麥瑄麟身上所穿嘅牛仔旗袍亦係Janko嘅作品，麥瑄麟就話揀買旗袍會考慮款式方唔方便，好似拉鏈同啪鈕咁，而佢身上呢件有潑墨效果嘅牛仔布配旗袍剪裁就令成件事型好多，一啲都唔娘喇！
王賢訊着中山裝被人誤認侍應
仁濟醫院副主席王賢訊同太太朱穎詩、長衫薈成員陳淑芝、冼國林太太羅寶兒、灣仔區議員伍婉婷、饒宗頤學術館之友創會會長孫少文女兒孫燕華等，亦穿着中式服裝現身。一向鍾意着中山裝出席活動嘅王賢訊笑言入面着tee都得，又唔使打呔，但自爆試過被誤認侍應，所以依家就醒目一係唔着黑色，着嘅話入面就加番恤衫，加上佢留咗鬚所以就冇咁似。
朱穎詩就話對旗袍特別有親切感，事關佢中學校服都係長衫款式，記得最初着住長衫返學搭校巴上梯級時仲會「爆衩」成日要自己縫番，慢慢習慣咗之後着住打排球都冇問題。孫燕華同羅寶兒就鍾意着住旗袍時行路同坐立姿勢都變得優雅，氣質急升。
卓妮