政情：小朋友玩具新奇 蔡李惠莉慢慢學
科技愈嚟愈進步，小朋友嘅玩具亦發展得更多元化，連大人都未必學得識。做開教育工作嘅保良局副主席蔡李惠莉早前出席一個學生嘅創意活動時，自爆依家小朋友啲玩具好新，好多遊戲機自己都唔識玩，真係要慢慢學o架！
老師亦要不斷進步
蔡太話自己細個冇咁多嘢玩，啲玩具都好簡單，畫紙、石頭等就係佢嘅玩具嘞！依家嘅小朋友就多咗好多嘢玩，尤其係一啲新推出嘅遊戲機，佢都唔太識玩。佢又話現時啲小朋友都好幸福，父母會帶佢哋周圍去，令小朋友見多識廣，叻好多，睇完嘅嘢又可以演變出更多事物。
講起依家嘅教育同以前有乜唔同？佢就話以前老師只需畀物料小朋友整作品，依家就發展到係小朋友去諗用乜嘢物料，所以老師都要不斷進步，先追得上小朋友嘅發展。