政情：被指似藝人 劉聖雪想搣甩花名
曾參選港姐嘅新民黨社區主任劉聖雪（Dana）近期頻頻落區工作，都幾忙碌。講起Dana參選港姐時有個「大口黃心穎」嘅花名，唔少黨友都覺得好奇，反問到底呢個花名係咪真，又研究佢同黃心穎到底有幾似。Dana都講笑話希望叫過佢另一個花名，睇嚟佢都覺得唔似。不過，亦都有黨友安慰佢，話呢啲無傷大雅嘅花名較易入腦，街坊都易啲記得喎！
膽固醇超標 疑遺傳問題
雖然Dana加入政黨之後每日行程都幾忙，但係佢勝在夠後生，體力應付冇問題，不過佢就有膽固醇問題。Dana透露，早在大學階段已經發現自己膽固醇近乎超標，所以當時即刻的起心肝，戒食紅肉一年，點知膽固醇依然無改善。最後Dana就放棄戒食紅肉計劃，因為估計同遺傳有關。佢現時每一至兩年就會檢查身體，膽固醇問題當然係關注重點喇！