政情：梁君彥謀讓路財會勢弄巧成拙
政府仲有唔夠半個月就換屆，但就仲有多項具爭議嘅工程項目有待立法會財務委員會審批，除咗尋日審議嘅港鐵沙中線工程追加撥款外，仲有啟德體育園撥款。立法會主席梁君彥（Andrew）提出「大會讓路財會」方案，建議大會提早於周四中午結束，以騰出時間畀財委會開會，但民主派就群起反對，尋日再次表明唔贊成Andrew為大會會議時間劃線，批評佢破壞議會傳統、做法係削足就履。咁樣落去就算財委會加到會，分分鐘都只係浪費時間去爭拗，到時真係弄巧反拙得個吉喇！
被批評破壞議會傳統
現屆政府即將卸任，而立法會亦將於下個月開始休會放暑假，現屆政府仍有唔少撥款期望可以喺換屆前通過。不過，凡事豈會盡如人意，雖然Andrew上任主席後不斷縮短立法會大會時間，由過往周三至周五縮減至周三至周四，政府亦主動出招打尖，將體育園項目排喺沙中線工程撥款之後，但財委會主席陳健波仍大呻財委會唔夠時間審議撥款。Andrew再提出將大會提早至周四下午一時結束，多名民主派議員尋日中午開記者會表明反對。
民主派會議召集人涂謹申就話，大會唔應該作出遷就，因政府法案以及表明議會立場嘅議案都比財委會撥款議案重要。議員楊岳橋亦都批評Andrew破壞傳統，開壞先例，認為佢唔應該為咗具爭議嘅撥款而削足就履。
民主派對讓路方案嘅爭議仲蔓延至下午內務委員會，佢哋向內會主席李慧琼抗議，批評Andrew事前未有諮詢議員係唔合理，又問到假如當日大會未完成討論，究竟係腰斬大會定係將財委會順延等問題。不過，李慧琼就指大會會議時間係由立法會主席決定，所以唔適合喺內會討論。
體育園滯後 馮程閉翳
而財委會尋日就繼續審議沙中線八億四千多萬元嘅追加撥款，民主派議員不斷提問，其中議員梁國雄就提出中止待續議案，但最後被否決，而財委會討論近三個多小時仍然得個吉，最後陳健波宣布提早約半小時休會。如果Andrew嘅大會劃線讓路方案變相令民主派及建制派爭拗增加，會議議而不決，咁就真係弄巧成拙，慳唔到時間之餘仲攞嚟衰添，睇怕主責啟德體育園嘅民政事務局常任秘書長馮程淑儀真係有得震冇得瞓喇！