古人話，名不正則言不順，言不順則事不成，香港記者協會都可謂作出最佳示範咯。試諗吓，如果呢個組織唔係掛上「香港記協」嘅牌頭，而係改為「壹淫媒記者協會」、「漢奸記者協會」或者「爛果報記者協會」，咁就唔會激起公憤，畀人鬧到七個一皮吖。
嗱嗱嗱，壹淫媒老闆漢奸黎粗言辱罵兼涉嫌恐嚇本報記者，「我實搞×你」、「×你老母×」等不堪入耳嘅說話全部有聲有畫播晒出街，全城嘩然，警方列作刑事恐嚇案調查，團體紛紛譴責，偏偏身為業界代表嘅記協好似食咗啞藥咁粒聲唔出，直至群情洶湧，避無可避，先至不情不願發出一個極簡短嘅聲明，最初嘅網上版聲明仲只以「六月四日的事件」隱晦交代，後來見唔對路再發出文字版，係就係有提到漢奸黎個衰名，但對佢嘅惡行依然隻字不提，更無譴責，一味叫記者報警了事，同助紂為虐冇乜分別。咁就難怪唔少人怒轟記協大細超，當《東方》記者唔係記者，踩上記協大門抗議喇。
當然啦，「吃人嘴軟，拿人手短」呢個道理，功夫茶都好理解嘅。係人都知，記協同漢奸黎關係千絲萬縷，部分頭面人物仲係漢奸黎嘅前下屬，之前網上流傳譴責漢奸黎嘅「記協聲明」雖然係假嘅，之但係其中一句「本協會今後拒絕接受黎智英任何捐款」，正中記協嘅死穴，就珍珠都冇咁真，記協火速否認就係咁解。家陣明晒喇，食咗狗糧嘅狗唔吠自己嘅主子，絕對合情合理o架，之但係做到咁出面就好樣衰囉，畀人鬧爆都冇乜好怨咯。
唔係咩，記協一直以新聞自由捍衞者自居，無論新聞界發生乜嘢事，佢哋都會第一時間仆倒表態，或抗議，或譴責，或遊行，連其他報紙更換頭條或管理層，都要叉隻腳埋去管一下，成個正義超人咁款，點知一旦涉及漢奸黎同壹淫媒啫，即刻換上另一副嘴臉，唔係變成鵪鶉咁嘅樣，就係索性做縮頭烏龜。呢，早前爛果報專欄作者因為唔肯聽漢奸黎支笛，唔止被封殺，仲被漢奸黎打為共產黨奸細，又唔見記協撲出嚟主持公道嘅？喺呢方面，記協同反對派政客都可謂有異曲同工之妙咯，之前爛果報被抽廣告，反對派咪又係一窩蜂喺立法會提出「捍衞新聞自由」動議囉，養兵千日用在一朝，唔恨得咁多嘞。
講到尾，記協唔想畀人日鬧夜鬧，搞到灰頭土臉，好簡單啫，改名咪得囉，橫掂佢哋早就同壹淫媒一家親，同附屬機構冇乜分別，咁就不如堂堂正正做番自己，無謂打着「香港記協」呢塊招牌欺世盜名吖。