政情：建制抽錯火水 畀尹兆堅鬧爆
立法會尋日召開工務小組委員會，審議多間醫院工程嘅撥款申請。議員鄺俊宇話，希望屯門醫院加建工程能夠盡快動工，因為「救人如救火」。點知呢番言論惹起建制派議員急急抽水，惟抽錯火水，反被鄺俊宇嘅黨友、議員尹兆堅反斥神志錯亂。
議員梁志祥聞「救人如救火」言論，批評泛民於會議較早時分審議東涌新市鎮擴建時提出休會議案，難以理解為何民主黨經常講一套做一套。議員葛珮帆則形容鄺俊宇「好肉緊」，個個工務小組議程都好緊急，認為想快就唔應每個項目都拖延。
被斥開會唔留心
尹兆堅其後反駁，批評兩人開會唔留心，唔好屈得就屈，仲質疑梁志祥係咪神志錯亂、葛珮帆或需醫療服務，事關佢哋審議東涌新市鎮時冇拉布，立場亦一致，唔似梁葛所屬嘅民建聯，當日於房屋事務委員會贊成將東涌新市鎮房屋比例增至七成，現時卻未有支持，希望唔好污衊他人去合理化自己失職。
其實會議早段所處理嘅係中止待續，而非休會，民主黨亦於會議上明言會投下棄權票，睇嚟議員抽水前真係要先做足功課。