政情：唔想阿仔做行會召集人？ 陳有慶：由佢自己決定

有傳佢細仔陳智思將會出任行政會議召集人，陳有慶就話唔知道，但就話阿仔依家已經忙到不得了。咁講唔通係唔想個仔做，想佢他條啲呢？陳有慶就話，當然希望陳智思可以他條啲，健康第一。不過如果個仔真係要做，咁大個人，就由佢自己決定喇！

方潤華同作曲大師合創咗首歌

同場又見到地產建設商會會董方潤華，佢最近同一位作曲大師合作創作一首歌，歌名叫做《香港夢》，方潤華負責填詞，早前仲喺大會堂首演添！講講吓，佢隨即攞出一張歌詞出嚟，睇嚟佢真係好開心。