政情：傳過檔勞福局 徐英偉(目及)實羅致光
我哋早前寫過，候任特首林鄭月娥籌組新班子嘅工作災難性受挫，多名林鄭心儀嘅人選盛傳被中央彈票，最終三司十三局十六名問責官員大部分係舊人同次選，當中只有將會出任勞工及福利局局長嘅前民主黨立法會議員羅致光一張外來新面孔。據聞有關方面對來自民主派嘅羅致光仲係有戒心，有意調派來自民建聯嘅現任民政事務局局長政治助理徐英偉做勞福局副局長，美其名就係協助羅致光了解政府運作，實際上就係(目及)實對方，以免佢利用局長身份私通泛民。事件再次反映中央對於所謂嘅溫和泛民、以至對林鄭嘅信任度偏低，估計羅致光上任後做咩都會綁手綁腳。
中央對溫和泛民仍存戒心
徐英偉早喺○八年加入政府出任民政局政助，做咗足足九年，之前已盛傳佢會喺今年七一後「升呢」做副局長。由於現任民政局局長、同屬民建聯成員嘅劉江華將會留任，冇理由同一個局嘅正副局長都來自同一個黨，因此其後有傳徐英偉會轉去政制及內地事務局做副局，擔當候任政制局長聶德權嘅副手。
不過，近日政圈又有一個新說法，話徐英偉會轉去勞福局做副局，原因之一係羅致光雖然熟悉勞福政策，但從未做過官，唔熟悉政府運作，有作為最資深政助嘅徐英偉湊住佢會好啲。另一個可能更重要嘅原因係，羅致光始終係民主派一員，以前仲有民主黨「大腦」之稱，雖然近年佢已淡出民主黨同民主派核心，但有關方面對佢點都有一定戒心，搵個建制派出身嘅副局長嚟(目及)住佢，各方面都可以安心一啲。
羅未上任已被翻撥款舊帳
其實中央及建制派對泛民出身嘅問責官員唔放心，今次並非首例。當年特首梁振英搵咗曾任民主黨副主席嘅張炳良入政府，原意係想佢出任教育局局長，但由於當時剛發生國教事件，加上土本及港獨思潮開始喺年輕一代興起，中央唔放心畀泛民人士掌管香港嘅教育政策，最後張炳良惟有改任運輸及房屋局局長，教育局局長就搵咗外號「吳得掂」嘅吳克儉頂上，結果對雙方嚟講都係一場悲劇。
今次羅致光入政府，雖然可以做番本身最擅長嘅勞福局，但係佢仲未上任，已經畀部分前線社工大翻佢支持社福機構一筆過撥款嘅舊帳，亦有工商界人士質疑佢係福利主義者，擔心佢上場後會大派福利同偏幫勞工界；再加上中央同建制派對佢嘅不信任，名副其實係三面受敵，做唔做得晒五年任期真係好難講。