中環出更：入主「漁灣辦」 張國鈞速忘樹根
民建聯（民記）喺東區漁灣嘅辦事處已運作逾廿年，該黨現任港島區直選議員張國鈞（Horace）尋日正式進駐，大談民建聯與漁灣邨居民之間嘅歷史往事。其實漁灣辦事處係由立法會前議員鍾樹根「扎根」嘅，但尋日民記嘅新聞稿就隻字不提辦事處原主人，Horace接受查詢時聲稱忘記發言時有冇提及樹根，完美示範咩叫「人走茶涼」。
一九九三年樹根入民記後，漁灣嘅民建聯東區支部就一直係民記嘅重要據點。但樹根去年喺立法會選舉讓路畀Horace後，即喺政界淡出，該辦事處遂由功能界別議員兼黨友黃定光（象哥）接手。象哥話，由於該辦公室面積大，如果只由同黨嘅區議員接手，僅能獲批一半面積，故由他出手承接，並加入Horace一齊做辦事處。
賣口乖補鑊 感激言謝
不過事後發出嘅新聞稿隻字不提樹根，心水清嘅人都會覺得好無情。Horace接受查詢時就大賣口乖補鑊，聲稱十分感激樹根貢獻，又稱全漁灣都唔會忘記佢，但被問到致詞時有否提到樹根時，佢就話唔記得。至於象哥就話喺儀式發言時提到樹根個名兩、三次喎！而鍾樹根就繼續離港享受假期，早前仲喺網上分享去以色列城市特拉維夫嘅旅行相添！
卓妮