中環出更：麥美娟勞動唔運動 減肥靠節食
夏天又到，又係女士瘦身嘅時候，唔少人都努力跑跑跳跳，希望盡快同脂肪講拜拜。立法會議員麥美娟（Alice）早前出席廣西社團總會（總會）舉行嘅八段錦活動時，就自爆完全唔做運動，笑稱自己係「做勞動唔做運動」喎！
Alice話，即使立法會有健身房，但佢冇乜時間去，因為太多嘢要處理，又要接見市民及團體，加上原本就冇做運動嘅習慣，所以今次做嘉賓喺咁多人面前學耍八段錦，壓力都幾大。唔做運動又想保持身段，惟有控制飲食喇！Alice笑笑口話，出席晚宴時，坐佢隔籬嘅人就最抵喇，因為佢所有嘢都唔食，只會飲嘢，但為免浪費食物，佢會畀晒隔籬食，笑稱隔籬朋友就可以畀一份錢食雙份嘢嘞！
數千人齊學八段錦破健力士紀錄
講番今次活動，共有數千人一齊學八段錦，打破咗健力士世界紀錄。總會會長蔡加讚為咗今次活動特別練咗幾個月八段錦，每日練半個鐘，平時佢去健身房健身比較多。被問到有冇帶一對子女去做運動，蔡加讚笑稱唔使，因為兩名小豆丁周圍跑就當做運動o架喇，仲話依家已追唔切佢哋喎！
同場仲有總會常務副會長何猷啟及今次活動籌委會主席羅正杰。平時做開健身房運動嘅何猷啟話，啱啱開始學八段錦，覺得八段錦同健身算係一柔一剛。羅正杰就練氣功十幾年，近日練埋八段錦添！佢認為太極、八段錦都係中國國粹，好過瑜伽，可惜年輕人唔留意，所以希望藉住今次活動多啲推廣咁話。
卓妮