早知今日，何必當初。漢奸黎爆粗辱罵本報記者兼出言恐嚇，公然妨礙新聞自由，全城人人喊打，唯獨《星島》為幫漢奸黎曲線護航，不惜戾橫折曲，顛倒黑白，誣衊本報「片段經過剪輯，未能了解事件始末」，結果咪極速跪低，喺報章登廣告澄清及撤回有關報道囉！
大家有眼見，漢奸黎醜行曝光後，連日嚟唔少學者同議員都發聲鬧爆，反而立法會班反對派政客好似食咗啞藥咁，粒聲都唔敢出，以致被同袍揶揄「黎智英籮柚摸不得」、「因為泛民驚畀佢搞」；仲有就係同淫媒同聲同氣嘅所謂記者組織，平時報章專欄作家冇得撈都要加把嘴，依家擺明有記者畀人兇，點知連屁都冇放一個。《星島》自詡愛國愛港報章，居然同呢班人搭埋同一條船，着埋同一條褲，話係咁啱得咁蹺喎，你信唔信吖？
講到呢度，功夫茶不期然諗起「助紂為虐」嘅歷史故事。話說當年劉邦攻入秦國首都咸陽，見宮室美女珠寶而心動，想話搬入去歎番夠本，即時被張良勸諫：秦朝正因為暴虐無道，你沛公至可以攻入咸陽，家陣話口未完就要安享其樂，同「助桀為虐」有乜分別？試諗吓，劉邦只係貪圖吓逸樂，已經畀臣下數到一戙都冇，好似《星島》咁為漢奸大敲邊鼓，條數功夫茶實會同你計！
當然啦，《星島》同劉邦根本唔喺同一個檔次，話佢哋「助紂為虐」實在太過抬舉。淫媒咁多年嚟宣淫販賤，老作新聞，播獨亂港，如果話佢哋係食人無數嘅大老虎，《星島》做引路嘅倀鬼，怕且都仲夠格嘅。
大文豪魯迅曾經講過︰「敵人是不足懼的，最可怕的是自己營壘裏的蛀蟲，許多事情都敗在他們手裏。」東方多年來同反中勢力針鋒相對，由香港淫媒到台灣獨媒，無役不與，驚都未驚過，反觀其他掛住愛國愛港牌頭嘅傳媒，淨係識匿喺後面剝花生幸災樂禍，唔幫拖都算喇，家陣仲有人掉番轉頭，喺背後捅刀子，問你死未。
不過冇計喇，中國從來盛產通敵賣國者，你有你岳飛「收拾舊山河」，佢有佢秦檜堅持同金人「議和」；你有你抗日「一寸山河一寸血」，佢有佢汪精衞搞「曲線救國」。前線敵人明槍易擋，後方「同志」冷箭反而難防，都咪話唔心寒！
其實車公幾年前已經點醒︰何為邪鬼何為神，神鬼如何兩不分。今時今日香港黑白不分，「愛國愛港」傳媒可以同對家暗通款曲，政府內部同樣可以有人身在漢營心在曹。北大人最近重申全面落實對港管治權，最緊要都係帶眼識人，認清敵友，否則講乜都嘥氣，何老闆你醒啲，咪做小漢奸呀！