全港第二大、被評為「具特殊科學價值地點」嘅大埔鷺鳥林，日前因康樂及文化事務署修剪樹木，搞到喺嗰度棲身嘅幼鷺慘被「大屠殺」。康文署被多個環保團體炮轟，但署長李美嫦連日都冇出來交代，只係派出該署署理助理署長香靜儀出來解畫。原來現時部門修剪樹木嘅指引並冇關於保護樹上動物嘅部分，過去亦冇類似嘅紀錄，即係康文署懶理樹上動物死活，唔怪得幼鷺會無辜喪命啦！唔知李美嫦連日匿埋搞緊乜呢？莫非臨急制訂保護樹上動物指引補鑊？
