立法會大會一向周三舉行，如仍有議程未完成就會於翌日即周四續會，立法會秘書處為咗令議員可以留喺立法會用膳，會喺宴會廳安排自助午餐，而費用就由議員平分。不過，秘書處早前向議員發出通告，並於四月開始取消咗逢周四續會嘅自助午餐安排，據聞事件嘅導火線之一，同三月底嘅一次續會，泛民議員郭家麒因為塞車趕唔切開會引致流會，間接浪費所有已經訂購嘅食物有關。
秘書處早前向議員發嘅通告話，自今屆立法會開始，唔少立法會會議喺星期四午膳前就結束，由於預訂咗嘅自助午餐唔可以取消，造成浪費。秘書處就建議，取消逢周四嘅自助午餐安排，如果有需要秘書處會為議員訂購飯盒。
有立法會議員爆料，秘書處有此決定係同三月底一次續會時，郭家麒原定於當日早上提出「促請下任行政長官重啟政改」無約束力議案，不過由於郭家麒塞車遲到，有議員為咗等佢而提出點算法定人數，最終導致流會。就係因為呢次意外流會，所有議員紛紛離開立法會大樓，所有預訂咗嘅自助午餐無人問津，促成咗秘書處於四月開始取消咗逢周四提供自助午餐嘅安排。
據聞有議員私下呻，自此續會留喺大樓內冇乜好嘢食，如果離開大樓食午餐，去得遠少少嘅地方又心掛掛擔心會導致流會，不過講到尾，秘書處嘅做法都係無可厚非，一切出發點都係為免議員浪費食物做大嘥鬼。