政情：木棉「飄雪」陳恒鑌全家鼻敏感
早前市區出現「飄雪」奇景，講嘅係香港常見樹種、木棉花嘅棉絮隨風飄揚滿天飛，除咗喺空中飄浮，更為道路添上薄薄嘅一層輕紗，情況為多年來少見。立法會議員陳恒鑌（Ben）形容今年情況誇張，搞到佢鼻敏感發作，而佢太太同囡囡情況更加嚴重，需要食藥同使用噴鼻劑。
阿Ben話，早前都收到唔少街坊投訴木棉樹問題，但佢認為花開咗有觀賞價值，其後又批評政府嘅樹木政策有問題，現時樹木種植欠缺規劃，一係種喺唔適合地方，一係就種得過密。佢續指，今年棉絮咁多，相信有大量種子飄到唔同地方落地生根，擔心政府唔妥善處理，未來嘅情況會更加誇張咁話。
籲向台灣學習
阿Ben又提及台灣都有一條木棉花道，但當地冇出現有關問題，認為係當地能夠及時移除部分種子，令到情況受控又減少破壞環境，睇嚟政府要多啲向唔同地區學習先得喇！